မီးအညှိခံထားရတဲ့စီးကရက်တွေလို
ငါတို့မိသားစု အစိပ်စိပ်အမွှာမွှာပစ်ချခံရတယ်
တစ်ယောက်တစ်နေရာဆီ သင်္ဘောပျက်နေရတဲ့နေ့တွေနဲ့
တစ်ယောက်အပျော်တစ်ယောက်ကူးစက်မခံရတဲ့ရောဂါတွေနဲ့
သားသမီးအော်ခေါ်သံ မိဘဖန်ဆေးမပေးနိုင်တဲ့အရပ်ဒေသတွေနဲ့
မိုင်ပေါင်းများစွာကျန်ရစ်ခဲ့တဲ့မိဘချွေးစက်တွေဆီ
မိုင်ပေါင်းများစွာဝေးကွာနေရတဲ့သားသမီးပုဝါစလေးတွေ
မီးကုန်ယမ်းကုန်အလွမ်းတွေနဲ့
ငါတို့မိသားစုဟာ
ပါးပြင်ပေါ် ဓားချက်တွေထွန်ချခံရတဲ့မြေယာ
ငါတို့မိသားစုဟာ
ထမင်းပန်းကန်ကိုကြည့်ရင်း တစ်ယောက်တည်း
လည်ချောင်းမှာ ငါးအရိုးစူးနေတယ်
ခြောက်ကပ်ကပ်သစ်သားစကိုစွဲလောင်နေတဲ့မီးလို
ငါတို့မိသားစုအသားစိုင်ထဲ စိုက်ဝင်နေတဲ့ငွေကြေး
ငါ့ညီလေးကို ကိုက်ချီထွက်ပြေးသွားတယ်
ငါ့ညီမလေးကို ကိုက်ချီထွက်ပြေးသွားတယ်
ဒဏ်ရာကိုဒဏ်ရာနဲ့ကုစားရတဲ့အရပ်ဆီ
ဒီခေတ်ဒီစနစ်ကြီးရဲ့ထားရာနေစေရာသွားနွားကျမှုမှာ
ငါတို့မိသားစုအကြောင်းတွေးမိရင်
ပြန်အမ်းရင်တောင် လက်ခါခံရမယ့်
ပတ်တီးအထပ်ထပ်ပိုက်ဆံအနွမ်းလေးတွေကို မြင်ရတယ်
လောကဓံတိုက်စစ်ရဲ့အလွတ်တည်ကန်ဘောတွေကို
ထိထိမိမိပုတ်ထုတ်ကာကွယ်မယ့်လက်တွေအဖြတ်ခံထားရတဲ့
ဂိုးစောင့်တွေကို မြင်ရတယ်
အံကြိတ်မာန်တင်းသံကို ကျောကုန်းပေါ် မနိုင်မနင်းထမ်းပိုးထားရတဲ့
လားသတ္တ၀ါတွေကို မြင်ရတယ်
တရားဝင်လင်ယောက်ျားမရှိလို့ ဖျက်ချခံလိုက်ရတဲ့ကိုယ်ဝန်လို
ငါတို့မိသားစု ပျက်ကျ
တစ်ယောက်ချင်းဆီဟာ အပေါင်ဆုံးပစ္စည်းလို
ခေတ်ကြီးထဲ စုန်းစုန်းမြုပ် ကျိုးကြေလို့
ငါသာ ငါတို့မိသားစုကို ပုံတူကူးပြခွင့်ရှိရင်
သေနတ်သံတစ်ချက်မထွက်ဘဲ ဒဏ်ရာတစ်ချက်မရဘဲ
သွေးစိမ်းရှင်ရှင်ပွက်ထနေတဲ့စစ်ပွဲတစ်ပွဲအကြောင်း
ရုပ်ရှင်ရိုက်မယ်
ဓာတ်ကြိုးနဲ့မလွတ်လို့ အရှင်လတ်လတ်ခုတ်ထစ်ခံလိုက်ရတဲ့
သစ်ကိုင်းလေးတွေပုံ ပန်းချီရေးမယ်
ချောင်ပိတ်ကြိုးတုပ်ပြီး အရိုက်ခံနေရတဲ့တိရစ္ဆာန်တွေအကြောင်း
ဝတ္တုရေးမယ်
ဘယ်တော့ပြီးဆုံးမယ်မသိတဲ့အရှုံးတွေနဲ့
ငါတို့မိသားစုဟာ
စိတ်ကူးတွေ သံသရာတစ်ဆုံး ဆွဲဆွဲငင်ငင်အူနေတယ်
ကိုသျှား
No comments:
Post a Comment