သူ့အရိပ်ကို ခို သူ့ကိုင်းကို ချိုးယူမီးစိုက်ပြီး သူ့ကို ခုတ်လှဲကြတော့မလား
သူ့သွေးကို သောက် သူ့အသားကို စားပြီး သူ့ဘ၀ကို ခါးပြကြတော့မလား
လမ်းဘေးစင်ပေါ်က ရေအိုးထဲ ၀င်ပုန်းရလောက်အောင် သူ အထည်ကြီးပျက်ခဲ့ရ
ကယ်သူမဲ့နေ့ရက်တွေမှာ မိစ္ဆာတို့ရဲ့အောင်ပွဲ သူ့ဘ၀ထဲ သောင်ထွန်းခဲ့ရ
ငါတို့ကို ငြိမ်းချမ်းရေးတေးသီပြတဲ့ သူ့တသွင်သွင်စီးဆင်းသံ ဘယ်ဆီဘယ်ဝယ်
သူ့ပုခုံးပေါ် ဦးလည်မသုန် ထမ်းပိုးလာခဲ့တဲ့သမိုင်းစာမျက်နှာတွေ ဘယ်ဆီဘယ်ဝယ်
အဝေးကငှက်ဆိုးတွေ ငါတို့ရင်ကို ကုတ်ခြစ် ငါတို့ရဲ့အသည်းနှလုံးကို ထုတ်ယူလိုက်သလိုမျိုး
ယဇ်ပလ္လင်ကို သူ့သွေးနဲ့ ဆေးကြောကြတော့မယ်
ငါတို့သာ ဆန်တစ်ပြည်ပေးခဲ့ရရင် ဆီတစ်ပုလင်းတော့ ပြန်ယူချင်မှာပဲ
ငါတို့သာ ပါးတစ်ဖက်အရိုက်ခံရရင် နားတစ်ဖက်ကိုတော့ ပြန်ကိုက်မိမှာပဲ
ငါတို့အတွက် သစ္စာသိကျွန်ယုံတစ်ယောက်လို သူ ပေးဆပ်ခဲ့သမျှတွေ ဘယ်မလဲ
ငါတို့အပေါ် လူမျိုးဘာသာမရွေး သူ နားလည်ခွင့်လွှတ်ပေးခဲ့သမျှတွေ ဘယ်မလဲ
ငါတို့ဟာ မိခင်ရဲ့သားမြတ်ကိုမှ ရက်ရက်စက်စက် ကိုက်ဖြတ်ချင်ခဲ့တာလား
ခေတ်အဆက်ဆက်သမိုင်းပေးတာဝန်တိုင်းကို ကျေပွန်ခဲ့တဲ့ ငါတို့ရဲ့ရဲဘော်ရဲဘက်
လူသားပေါင်းသန်းခြောက်ဆယ်ကျော်ကို အခိုင်မာဆုံးချည်နှောင်ထားတဲ့ကြိုးတစ်ချောင်း
သွေးဆာနေတဲ့ဓားချက်တွေအောက်မှာ သူ့အသက်သူ မချိမဆံ့ ပြန်လုနေရရှာပေါ့
ဧရာဝတီ . . .
ကိုသျှား
No comments:
Post a Comment